Өткөн жылдын 8-ноябрь күнү Ноокенде сайдан 19 жаштагы кыздын жансыз денеси
табылган. СЕРЕП МЕДИА маалымат агенттигине кыздын апасы шектүү кармалганын айтып, сот акыйкаттык чечим чыгарып берүүсүн суранган.
- Милицияга Масы айылындагы Алаш сайында кыз кишинин жансыз денеси жаткандыгы кабарланган. Алдын ала текшерүү иштери учурунда кыз киши колдуу болгондугу, маркум Базар-Коргон районунун 19 жаштагы тургуну экени аныкталып, Жазык кодексинин 122-беренесинин негизинде (адам өлтүрүү) кылмыш иши козголгон. Кылмышка шектелип, буга чейин зордуктоо жана башка беренелер менен бир нече жолу соттолгон, акыркы жолу 2021-жылы баңгизатка байланыштуу кылмыш жоопкерчилигине тартылган Сузак районунун тургуну, 1964-жылы туулган жаран кармалган.
Бүгүн, 25-апрелде редакцияга шектүүнүн өмүр бою эркинен ажыратылганы маалым болду. Маалыматты
СЕРЕП МЕДИА маалымат агенттигине Жалал-Абад облустук сотунан тастыкташты.
"Сузак райондук сотунун 22-февралдагы өкүмү менен, соттолуучу Кылмыш-жаза кодексинин 122-беренесинин 7,8-пункттары, 283-беренесинин 1-бөлүгү, 283-беренесинин 1-бөлүгү жана 283-беренесинин 1-бөлүгү менен күнөөлүү деп табылып, төмөндөгүдөй жаза белгиленген.
Кылмыш-жаза кодексинин 122-беренесинин 7,8-пункттары менен үй-мүлкүн конфискациялоо жолу менен өмүр бою эркиндигинен ажыратылган.
Кылмыш-жаза кодексинин 283-беренесинин 1-бөлүгү менен 5 жылга эркиндигинен ажыратылган.
Кылмыш-жаза кодексинин 283-беренесинин 1-бөлүгү менен 5 жылга эркиндигинен ажыратылган.
Кылмыш-жаза кодексинин 283-беренесинин 1-бөлүгү менен 5 жылга эркиндигинен ажыратылган.
Кылмыш-жаза кодексинин 77-беренесинин 3-бөлүгүнүн негизинде кылмыштардын жыйындысы боюнча акыркы жазасы кыйла катуу эмес жазаларды сиңирүү жолу менен үй-мүлкүн конфискациялоо жолу менен өмүр бою эркиндигинен ажыратылган жазасын дайындалып өзгөчө тартиптеги түзөтүү абагында өтөсү белгиленген", - дешти.
