Саламаттыкты сактоо министрлиги 12 менчик медициналык окуу жайлардын №6 формасын белгиленген стандарттарга жооп бербегендиктен чакыртып алды. Бул тууралуу аталган министрликтен билдиришти.

№6 форманы берүү (клиникалык базанын жана медициналык жабдуулардын болушу) саламаттыкты сактоо боюнча ыйгарым укуктуу орган, башкача айтканда, Саламаттык сактоо министрлиги тарабынан жүзөгө ашырылат. Министрликтин эксперттик комиссиясы материалдык-техникалык, клиникалык базалардын жана медициналык жабдуулардын саламаттыкты сактоо тармагындагы медициналык жана фармацевтикалык билим берүү ишмердүүлүгүнө лицензиялык талаптарга ылайык келүү деңгээлине баа берет.

2021-жылы эксперттик комиссия текшерүү жүргүзүп, клиникалык жайларды колдонууда белгиленген стандарттарга ылайык келбеген учурлар аныкталган. Министр Алымкадыр Бейшеналиевдин тапшырмасы боюнча №6 форма 12 менчик медициналык окуу жайдан алып салынат, анткени клиникалык жайларды пайдалануу белгиленген стандарттарга жооп бербейт. Калган 5 менчик медициналык билим берүү уюмдарында 15-мартка чейин министрликтин комиссиясы текшерет. 

№6 форма кайтарып алынчу окуу жайлар: 1. «Адам» университети (Бишкек каржы-экономикалык академиясы); 2. Кыргызстан эл аралык университети; 3. Эл аралык «Авиценна» медициналык институту; 4. Эл аралык медицина институту; 5. «Роэль Метрополитен университети»; 6. «АВС» Академия ЖЧКсы; 7. Эл аралык медицина жана илим университети; 8. Эл аралык илим жана бизнес университети; 9. «Эл аралык Бишкек медициналык институту»; 10. Илимий изилдөө медициналык-социалдык институту; 11. Кыргыз медициналык-стоматологиялык институту; 12. Ош эл аралык медицина университети. Текшерилүүчү окуу жайлар: 1. Эл аралык «Ала-Тоо» университети; 2. Саткынбай Тентишев атындагы Азия медициналык институту; 3. «Салымбеков университети»; 5. Эл аралык медицина жогорку мектеби; 5. Эл аралык медицина университети.