Твиттер социалдык тармагынын негиздөөчүсү кол койгон биринчи "твит" баалуу буюмдар аукционунда 2 миллион 900 миң долларга сатылды. Бул тууралуу чет элдик басылмалар жазып чыгышты. Маалыматка ылайык, аукциондогу соодалашууну жеңген Bridge Oracle компаниясынын башкы директору Хакан Эстави болду. Ал бул виртуалдык менчик үчүн 2 миллион 900 миң долларга жакын каражат төлөгөн. Ал акчанын бардыгы COVID-19 пандемиясынын шартында Африка мамлекеттерине кайрымдуулук жардамына жумшалат. Биринчи "твитти" Твиттер социалдык тармагынын негиздөөчүсү Жек Дорси 2006-жылы 21-мартта 15 жыл мурун жазган. Бул посттун мазмунунда "Менин твиттеримди жөндөө" деп жазылган. Кызыгы бул "твит" аукционго биринчи жолу 2020-жылдын 15-декабрында сунушталган. 19-декабрдан 21-декабрга чейин анын баасы 1 доллардан 3 миң 500 долларга чейин жогорулаган. Бирок 27-декабрда акыркы катышуучу сунушун кайтарып алып, аукцион кайрадан башталууга аргасыз болгон. 15-февралда биринчи твитке кайрадан 1 доллар сунушталган. Андан кийин 6-мартта бир күндүн ичинде анын баасы 2 миллион 500 миң долларга көтөрүлүп, 22-мартта соодалашуунун акыркы катышуучусу Хакан Эстави өзүнүн сунушун 2 миллион 900 миң долларга көтөрүп, виртуалдык лотту алып, лидерлигин бекемдеди.