Ален Берсе Швейцариянын президенттигинен кетти. Коштошуу иретинде Берсе өзүнүн X (Twitter) баракчасына кыскача видеону жарыялады. Бул тууралуу Ukrainian News telegram-каналы билдирди. 

Ален Берсе президент болуп шайланганга чейин өлкөнүн ички иштер министри болуп, социалдык блокту, ошондой эле маданият жана саламаттыкты сактоо тармагын көзөмөлдөгөн. Ал парламент тарабынан 2023-жылы Швейцариянын федералдык президенти болуп 12 айлык мөөнөткө шайланган. Буга чейин 2018-жылы да ушул эле кызматты аркалаган.

Президенттин саясий таасири жана салмагы бар көпчүлүк өлкөлөрдөн айырмаланып, Швейцарияда анын эч кандай реалдуу ыйгарым укуктары жок – аларды бүткүл өлкөнүн атынан жамааттык орган – Федералдык Кеңеш жүзөгө ашырат. Анын жети мүчөсүнүн ар бири ротациянын негизинде бир жыл бою президент болот.

Швейцариянын жаңы президенти болуп Швейцариянын Коргоо, коомдук коргоо жана спорт департаментинин башчысы, 61 жаштагы Виола Амгерд дайындалды.