Октябрь окуяларында каза болгон Алтынбек уулу Үмүтбектин үй-бүлөсүнө жакын арада Бишкектен батир берилет. Бул тууралуу президенттин маалымат катчысы Эрбол Султанбаев Фейсбуктагы баракчасына жазып чыкты.

Маалыматка караганда, мындай тапшырма Садыр Жапаров тарабынан 2020-жылдын октябрь-ноябрь айларында берилген. Бирок борбор калаанын мэриясынын айрым жооптуу кызматкерлеринин жоопкерчиликсиз мамилесинен улам бул маселе өз убагында чечилген эмес. "Бул маселе мамлекет башчысынын жеке көзөмөлүндө, каза болгон Үмүтбектин үй-бүлөсү жакын арада борбордон турак жай менен камсыздалат", - деп айтылат маалыматта.

Алтынбек уулу Үмүтбек 5-октябрда Бишкектеги "Ала-Тоо" аянтында болгон башаламандыкта каза болгон. Ал болгону 19 жашта болчу.