Кыргызстанда балдарды полиомиелитке каршы эмдөө башталды
Кыргызстанда балдарды полиомиелитке каршы эмдөө өнөктүгү башталды. Бул тууралуу Саламаттыкты сактоо министрлигинин басма сөз кызматынан билдиришти.
Маалыматка караганда өнөктүк 19-апрелден 19-майга чейин уланып, вакцинаны 2016-жылдын 1-апрелинен 2018-жылдын 15-февралына чейин төрөлгөн балдар алышат. Эмдөө акысыз жүргүзүлөт. Министрлик бул өнөктүктүн максаты эмдөөнү өткөрүп жиберген балдардын 95 пайызын эмдөө экендигин белгиледи. 270 миңден ашуун баланы эмдөө пландалууда.
Полиомиелит — инфекциялык оору, вирустар аркылуу жугат. Балдардын нерв системасын жабыркатып, шал оорусуна алып келет. Буга чейин ДССУ Тажикстанда полиомиелит оорусунун козголгонун билдирген эле.
