Сауд Арабиянын Кыргызстандагы элчиси Абдурахман бин Саид Аль-Жума эки өлкөнүн ортосундагы достуктун жана кызматташтыктын бекемделишине кошкон зор салымы үчүн мамлекеттик сыйлык – “Данакер” ордени менен сыйланды. Бул тууралуу президенттин аппаратынын маалыматтык саясат бөлүмүнөн билдиришти. Бүгүн, 18-мартта президент Садыр Жапаров Сауд Арабиянын элчисин дипломатиялык миссиясы аяктап жаткандыгына байланыштуу кабыл алды. Маалыматка ылайык, жолугушуунун жүрүшүндө мамлекеттер аралык кызматташуунун актуалдуу маселелери, анын ичинде соода-экономикалык жана транспорт чөйрөсүндөгү маселелер тууралуу пикир алмашышты. Анда Садыр Жапаров эки өлкөнүн ортосундагы саясий, соода-экономикалык, маданий-гуманитардык кызматташтык туруктуу деңгээлде өнүгүп жатканына канааттанганын айтып, "мындан ары да бекемделишине терең ишенем" деп билдирген.