Роза Отунбаева менен Сооронбай Жээнбековду айрым артыкчылыктарынан ажыратуу сунушталууда. Тагыраагы депутат Жеңиш Токторбаевдин демилгеси менен "Президенттин ишмердигинин кепилдиктери жана экс-президенттин статусу жөнүндө" мыйзамына өзгөртүүлөрдү киргизүү тууралуу мыйзам долбоору коомдук талкууга коюлду. Депутаттын айтымында, мыйзам долбоору бюджеттик каражаттарды рационалдуу колдонууга багытталган. Документте төмөндөгүдөй артыкчылыктардан ажыратуу сунушталууда: ▪️ Жаңы президент ишке киришкенден кийин бир айдын ичинде мамлекеттик резиденцияны пайдаланууну токтотуусу; ▪️ Мамлекеттик дачалардын бирин өмүр бою пайдалануу укугунан ажыратылуусу; ▪️ Өмүр бою мамлекеттик кайтарууда болуусу алынып, жан сакчыларды өз эсебинен каржылоосу; ▪️ Экс-президентти, жубайын жана жашы жете элек балдарын акысыз медициналык тейлөө алып салынуусу; ▪️ Мамлекетке караштуу телефон, интернетти акысыз колдонуу, почта жана телеграф жөнөтүүлөрдү өкмөттүк разрядда тейлөө беренеси жокко чыгарылуусу; ▪️ Пенсия жана маянасы өзгөртүүсүз калган. Анын өлчөмү президенттин айлыгынын 75 пайызына барабар. Экс-президент макамына Роза Отунбаева менен Сооронбай Жээнбеков ээ. Буга чейин Жеңиш Токторбаев экс-президенттерге берилген мамлекеттик күзөттү алып салуу керектигин көтөрүп чыккан болчу.