Экономикалык кылмыштарга каршы күрөшүү мамлекеттик кызматынын мурдагы башчысы Бакир Таиров мамлекеттик бюджетке 14 миң доллар төлөп, эч жакка чыкпоо тил каты менен бошотулду. Бул тууралуу бүгүн, 18-февралда Биринчи Май райондук сотунун басма сөз кызматынан билдиришти. Маалыматка караганда, прокурор менен Таировдун ортосунда кызматташтык келишими түзүлгөн. Мындан тышкары Таиров мамлекеттик казынага 14000 доллар төлөгөн. Бакир Таиров 10-декабрда кармалган. Тергөөнүн версиясы боюнча, 2020-жылдын октябрь айында мурдагы чиновник саясий партиялардын бирин каржылоо керек деген шылтоо менен мамлекеттик органдардын жетекчилеринин бирин ага акча которууга мажбур кылган.

Ал Каржы полициясын 2018-жылдын 28-апрелинен бери жетектеп келген. 2020-жылдагы октябрь окуяларынан кийин премьер-министр Садыр Жапаров департаменттин жаңы төрагасы кылып Сыймык Жапыкеевди дайындаган болчу.