Талас облусунда өгөй атасы кызын үч жыл бою зордуктап келген. Азыр ал кош бойлуулуктун бешинчи айында. Бул тууралуу Акыйкатчы аппаратынан билдиришти.

Белгиленгендей, Акыйкатчы институтуна 16 жаштагы кыз өгөй атасы тарабынан зордукталгандан кийин кош бойлуу болуп калганын жана ал энеси менен урушуп кеткендиктен, психологиялык жардамга муктаж экендигин айтып, эркек киши кайрылган. Бул кайрылуудан кийин аппарат кызматкерлери иштин чоо-жайын билишкен, ошондой эле 29-июнда кыздын энеси, Орто-Арык айылынын тургуну, 1986-жылы туулган аял бул факты боюнча арыз жазган. Арызда ал 1971-жылы туулган киши менен 2014-жылы баш кошконун көрсөткөн. Аялдын биринчи никесинен үч баласы болгон, бирок ал күйөөсү урганына карабастан, жашап келген. 2017-жылы кичүү уулуна жүрөк оорусу диагнозу коюлуп, Түштүк Кореяда операция жасатууга туура келген. Эки жылдан кийин ал Кызыл жарым Ай коомунун жардамы менен уулу менен Түштүк Кореяга операция жасатууга барган. Бул учурда күйөөсү биринчи жолу кызын зордуктаган. Ошол учурда кыз 13 жашта болчу. Ал "Эгер бирөөгө айтсаң, сенин апаңды жана эки бир тууганыңды өлтүрүп салам" деген сөздөр менен коркуткан. Апасы белгилегендей, үч жыл бою экинчи күйөөсү кызын зордуктап келген. Апасы кызынын кош бойлуулуктун бешинчи айында, ич кийим сатып берип жатканда, жакында гана билген.

"Күйөөсүнө телефон чалуулардан кийин качып кеткен. Апасы өзүнө келип, милицияга арыз жазганга чейин 5-6 күн өттү. Азыр милиция жигердүү эмес, ошондуктан ал билдирүү жасады", - деп белгилешет Акыйкатчы институтунан.