Талас районунда ооруканага 58 жаштагы кишинин жансыз денесин алып келишкен, кийин бул иштин алкагында 3 жаран кармалды. Бул тууралуу облустук ички иштер башкармалыгынын басма сөз кызматынан билдиришти. Облустук милициянын маалыматы боюнча, 19-июнь күнү саат 05:20 чамасында Кара-Буура райондук ички иштер бөлүмүнүн нөөмөт бөлүмүнө аймактык ооруканадан билдирүү түшкөн. Алар Чымгент (Чолпонбай) айылынын 1963-жылы туулган тургунунун жансыз денесин алып келишкенин билдиришкен. Ыкчам иш-чаралар көрсөткөндөй, маркумдун 1997-жылы туулган уулу айылдаштары тарабынан сабалган. Баланын бети кан болуп, ал 1996-жылы, 1999-жылы жана 2001-жылы туулган жарандар тарабынан ур-токмокко алынган. Маркум уулуна болушуп, чыр-чатакка аралашып, каза болгон. Өлүмгө эмне себеп болгону азырынча белгисиз. 19-июнда чыгарылган Кара-Буура райондор аралык соттук-медициналык экспертизанын бүтүмүнө ылайык, каза болгон жарандын денесинде зордук-зомбулуктун белгиси аныкталган эмес. Бирок маркумдун туугандары экспертизанын ишинде кемчиликтер болушу мүмкүн дешип, эксперттин бүтүмүнө ишенбестигин билдиришкен. Ур-токмокко алуу фактысы боюнча "бейбаштык" беренеси менен сотко чейинки өндүрүш башталып, жогорудагы үч жаран тергөө изоляторуна киргизилген. 58 жаштагы кишинин каза болгон фактысы боюнча тергөө иштери уланууда.