Мамлекет башчы Садыр Жапаровдун кортежи катышкан жол кырсык боюнча иш козголду. Бул тууралуу ИИМдин басма сөз кызматынан билдиришти. Маалыматка караганда, факты боюнча Жазык кодексинин 297-беренесине (жол кыймылынын жана автомототранспорт каражаттарын эксплуатациялоонун эрежелерин бузуу) ылайык кылмыш иши козголгон. Аталган ишти Ысык-Көл облустук ички иштер башкармалыгы иликтеп жатат. Президенттик кортеждин унаасын сүзгөн унаанын айдоочусу учурда ооруканада. 4-июнда Ысык-Көл районунун Ананьево айылынын тушунда Садыр Жапаровдун кортежиндеги жол тандабас жеңил унаа менен сүзүшкөн. Анын кесепетинен УКМКнын 9-кызматынын кызматкери окуя болгон жерде каза болгон. Кийинчерээк каза болгон жарандын президенттин дарыгери экендиги маалымдалган.