Пара талап кылуу фактысы боюнча УКМКнын жалган кызматкери кармалды. Бул тууралуу УКМКдан билдиришти. УКМК тарабынан коррупцияга байланыштуу кылмыштарды аныктоо, алдын алуу жана бөгөт коюу боюнча жүрүп жаткан иш-чаранын алкагында, акча талап кылуу жана пара алуу фактысы боюнча, УКМКнын кызматкеримин деген жалган кызматкер кармалган. Маалыматка караганда, аталган жаран Ат-Башы райондук мамлекеттик администрациясына текшерүү жүргүзүп, түзүлгөн актыны оң тарапка чечип берем деп жетекчиликтен 100 доллар өлчөмүндө акча каражатын талап кылган. Бул факты боюнча Жазык кодексинин 98-беренесине ылайык кылмыш иши козголуп, кылмышка шектүү жаран кармалып, Нарын ШИИБдин убактылуу кармоочу жайына киргизилген. Учурда буга окшогон фактыларды аныктоо боюнча тиешелүү иш-чаралар жүргүзүлүүдө.