Мурдагы депутат Султанбай Айжигитов менен жубайы үй камагына чыгарылды
Жогорку Кеңештин мурдагы депутаты Султанбай Айжигитов менен жубайы үй камагына чыгарылды. Бул тууралуу Биринчи Май райондук сотунан билдиришти.
Маалыматка караганда, алар 2-июнга чейин үй камагында болот.
Буга чейин УКМК маалымат таратып, Султанбай Айжигитов менен жубайы кызматтык абалынан кыянаттык менен пайдаланган деп айыпталып жатканын билдирген. Маалыматка караганда, Айжигитов 2021-жылы Жогорку Кеңештин депутаттыгына шайлангандан кийин кызматтык турак жай жана башка жеңилдиктерди жеке кызыкчылыгы үчүн пайдаланып, 2022-жылдын башында жубайын Жогорку Кеңештин аппаратына мыйзамсыз жумушка орноштурууну уюштурганы аныкталган.
"Айжигитов 2005-2008-жылдары жана 2010-2011-жылдары Баткен облусунун губернатору болуп турганда мамлекеттик кызматка ушундай мамиле кылган. Эки жолу тең Айжигитов аялын мыйзамсыз ишке орноштурган, тагыраагы Жолдошова Баткен облусунун мамлекеттик администрациясына караштуу «Төрт-Гүл» мейманканасынын директору болуп, күйөөсүнө түздөн-түз баш ийип, мыйзамсыз түрдө эмгек акы жана башка төлөмдөрдү алып жүргөн",- деп айтылган маалыматта.
