"Коркутуп, колун скотчтоп...". Бишкекте каракчылыкка шектелген жигит кармалды
Бишкекте каракчылыкка шектелген жаран кармалды. Бул тууралуу борбор калаанын Биринчи Май районунун ички иштер башкармалыгынан билдиришти.
Маалыматка караганда, 14-сентябрда шаардык милицияга аял киши кайрылып, кечинде белгисиз жаран Ак-Босого конушундагы үйүнө кирип, электрошокер менен коркутуп, арыз ээсинин колун скотч менен байлап, 12 миң сом уурдап кеткенин айткан. Аталган факты боюнча Кылмыш-жаза кодексинин 202-беренесине ("каракчылык") ылайык кылмыш иши козголду. Укук коргоо кызматкерлери 21 жаштагы шектүүнү кармашып, убактылуу кармоочу жайга киргизишти. Тергөөнүн версиясы боюнча, жигит башка каракчылык иштерге да катышкан.
