Адам өлтүрүүгө катышкандыгы үчүн Казакстандын укук коргоо органдары тарабынан издөөдө жүргөн Казак жараны кармалды. Бул тууралуу УКМКдан билдиришти. Маалыматка караганда, 26-сентябрда УКМК тарабынан жүргүзүлгөн ыкчам-издөө иш-чараларынын жүрүшүндө Бишкек шаарынын аймагынан 1995-жылы туулган Алматы шаарынын тургуну кармалган. Ал расмий өтмөктөрдү айланып, казак-кыргыз мамлекеттик чек арасын мыйзамсыз кесип өтүп, андан соң эл аралык “Манас" аэропорту аркылуу үчүнчү мамлекеттерге учуп кетүүнү көздөгөн. УКМК тарабынан ага карата Кылмыш-жаза кодексинин 378-беренеси (мамлекеттик чек араны мыйзамсыз кесип өтүү) боюнча кылмыш иши козголуп, 27-сентябрда Октябрь райондук сотунун чечими менен чет элдик жаран Бишкек шаарынын №1 тергөө абагына 2 айлык мөөнөткө камакка алынды. Ошол эле учурда, тиешелүү ыкчам-иликтөө иш-чараларынын жүрүшүндө шектүүнүн Казакстандын укук коргоо органдары тарабынан адам өлтүрүүгө катышкан деп издөөдө жүргөнү аныкталган.