Бишкек гарнизонунун Аскер прокуратурасы мурдагы президент Алмазбек Атамбаевдин дарыгеринин сабалышы боюнча тергөө ишин баштады. Бул тууралуу Башкы прокуратуранын маалымат кызматынан билдиришти. Маалыматка ылайык, үстүбүздөгү жылдын 18-февралында аталган факты Кылмыштар жана жоруктардын бирдиктүү реестрине Кылмыш кодексинин 321-беренеси ("Бийликтен аша чабуу") боюнча катталган. Учурда тергөө иши жүрүүдө. Белгилей кетсек, 2019-жылы август айларындагы Кой-Таш окуясында "Альфа" атайын бөлүгүнүн кызматкерлери эркек адамды сабап жатышкан видео интернет түйүндөрүндө тарап кеткен. Кийинчерээк ал сабалган адам Атамбаевдин жеке дарыгери экени белгилүү болгон.