Аксы районунда сабалган кишинин аялы жана баласы шектүү делип Аксы РИИБдин убактылуу кармоочу жайына киргизилди. Бул тууралуу Жалал-Абад ОИИБдин басма сөз кызматынан билдиришти. Маалымат боюнча, Аксы райондук ички иштер бөлүмүнө Авлетим айыл аймагынын 1962-жылы туулган тургуну арыз менен кайрылган. Ал өз арызында 25-июнь күнү саат 20:00 чамасында аялы жана баласы экөөлөп үйүнүн ичине камап алып, уруп, денесине залал келтиргендигин билдирген. Бул окуя боюнча топтолгон материалдар 27-июнда Аксы РИИБи тарабынан Жазык кодексинин 144-беренеси (Уруп-согуп кыйноо) менен катталып, сотко чейинки өндүрүш иши башталган. Аталган окуя боюнча Аксы РИИБдин жетекчилиги, тергөө-ыкчам тобу чыгышып, окуя болгон жерге кароо жүргүзүлүп, сүрөткө алынган. "Азыркы учурда жабырлануучунун денесине соттук-медициналык экпертиза дайындалган. Сотко чейинки өндүрүш ишинин алкагында тиешелүү адамдар суралып, окуянын чоо-жайы такталып, натыйжада шектүү катары жабырлануучунун 1963-жылы туулган аялы жана 26 жаштагы уулу кармалып, тергөө тарабынан 48 саатка Аксы РИИБдин убактылуу кармоочу жайына киргизилген. Учурда тергөө амалдары уланууда", - деп билдиришти Жалал-Абад ОИИБнин басма сөз кызматынан. Буга чейин социалдык тармактарга Авлетим айыл өкмөтүнүн Дейрес айылында белгисиз бир жаран баласы менен аялы тарабынан сабалган делип, жабыркаган кишинин видеосу тараган.