Ысык-Көл облусундагы тилсиз жоодон 92 миллион сомдон ашык материалдык баалуулуктар сакталган. Бул тууралуу ӨКМден билдиришти. Маалыматка караганда, ушул жылдын 4 айында Ысык-Көл облусунун аймагында 115 өрт кырсыгы катталып, материалдык чыгым 12 миллион 59 миң 93 сомду түзгөн.

Өрттүн кесепетинен 2 адам каза болуп, 6 адам жаракат алган. Эң көп өрт турак жай секторунда катталган – 54 өрт чыккан.

“Өрт-куткаруу бөлүмдөрүнүн өздүк курамынын күчү менен өрттү өчүрүүдө 92 миллион сомдон ашуун материалдык баалуулуктар сакталган. Өрттүн негизги себептери - электр жабдууларын эксплуатациялоо эрежелерин бузуу, отко этият мамиле кылбоо, тамеки чегүүдө этиятсыздык жана башкалар болуп саналат”, - деди подполковник Ринат Абдулманов.

Облустагы ​ өрттүн жайылышы:

•  Каракол шаарында - 26 өрт кырсыгы катталып, 1 адам каза болуп, 6 адам жаракат алган;
•  Балыкчы - 15;
•  Ак-Суу району - 14;
•  Жети-Өгүз району - 13;
•  Ысык-Көл району- 18;
•  Тоң району - 17;
•  Түп району - 12.