Ички иштер министрлиги Жаныш Бакиевди Баңгизаттарды мыйзамсыз жүгүртүүгө каршы күрөшүү кызматынын мурдагы жетекчилеринин стендине кошуп, ага сот тарабынан ажыратылган генерал-лейтенант наамын жана сый-урматты кайтарып берди. Мындай пикирин юрист Замир Жоошев Фейсбук баракчасына жазды. 

«2013-жылы Медет Садыркуловдун өлүмү боюнча Бишкек гарнизонунун Аскердик соту Жаныш Бакиевди үй-мүлкүн конфискациялоо менен өмүр бою эркинен ажыраткан. Ал генерал-лейтенант аскердик наамынан да ажыратылган эле. Ал эми Баңгизаттарды мыйзамсыз жүгүртүүгө каршы күрөшүү кызматынын стендиндеги сүрөттө Жаныш Бакиев генерал-лейтенанттын формасын кийген», - дейт юрист. 

«Бул жазанын негизги максаты – бир эле учурда оор же өзгөчө оор кылмыш үчүн соттолуунун болушу (адамга терс мүнөздөмө берүү) менен айрым наамдар менен жетишкендиктердин (адамга оң мүнөздөмө берүү) ортосундагы карама-каршылыктарды жоюу. Бирок иш жүзүндө карама-каршылыктар байкалууда. Сот бийлигинен турган мамлекеттик аппарат Жаныш Бакиевдин инсандыгын терс жана татыксыз генерал-лейтенант катары сыпаттап, ИИМ жана Баңгизатка каршы күрөшүү өкүлдөрүнүн образында генерал-лейтенант катары урмат-сыйга татыктуу деп тааныган. Ар бир мамлекет ичинде бөлүнүп-жарылса, анда бош болуп каларын унутпашыбыз керек”, - деп жазды Замир Жоошев. СЕРЕП МЕДИА маалымат агенттиги бул боюнча ИИМге кайрылганыбызда, стендден анын сүрөтү алынганын, ушул маалымат жетиштүү экенин билдиришти.