Садыр Жапаровго жөнөткөн кайрылууга кол коюп берген маданият ишмерлери эмне дешет?
Соцтармактарда бир канча коомдук ишмерлердин президент Садыр Жапаровго жолдогон кайрылуусу тараган.
Кайрылууда өкмөттүн Чүй облусундагы мурдагы өкүлү Туйгунаалы Абдраимов, депутаттар Бакыт Жетигенов, Жанар Акаев, Алтынбек Сулайманов, ички иштер министринин мурдагы орун басары Курсан Асанов, экс-депутаттар Исмаил Исаков, Ахматбек Келдибеков, Жылдызкан Жолдошова жана Азамат Мусакеевдин 17-сентябрь күнү 100 миң киши алып чыгып, бийликти алмаштырабыз деген чакырык менен ЖМКларга маек бергени жазылган.
Мамлекет башчысына кайрылууга маданияттын мыкты кызматкери Сонунбү Кадырова, эстрада ырчысы Венера Пирматова кол коюп, акын Меңди Мамазаирова, Эл артисти Шайгүл Алсеитова, илимпоз Үмүт Култаева жана Кыргыз Республикасынын Эмгек сиңирген артисти Абаз Чикеев телефон аркылуу макулдугун беришкени да жазылган.
Ошол эле күнү телефон аркылуу макулдугун берди делген Меңди Мамазаирова Фейсбуктагы баракчасына кол коюп бербегенин, катты көрбөгөнүн жазып чыкты. «Бүгүн бир каттын айынан коомчулукта ызы-чуу болуп атканын билбептирмин. Кечке съемкада жүрүп, кечинде көрдүм. Сонунбү Кадырова эк-үч күн мурда мага чалып «Эже, Туйгуналы Абдыраимов ызы-чуу уюштурмакчы болуп жатыптыр, кат жаздык кол коюп бересизби?» деди. Мен коомдогу ызы-чуудан тажагандыктан, макул дегем, бирок кол коюп берген эмесмин. Катты көргөн да эмесмин. Ал эми каттагы белгиленген инсандар мен сыйлаган инсандар. Алар тууралуу мен жаман пикир айтышым мүмкүн эмес. Жылдыз Жолдошова, Ахматбек Келдибеков, Исмаил Исаков, Курсан Асанов тууралуу мен тескери пикир билдиришим да мүмкүн эмес. Менин атымды мен көрбөгөн, мен кол койбогон каттарга пайдалана беришкени туура эмес», — деп жазды ал.
Дагы бир телефон аркылуу макулдугун берди делген илимпоз Үмүт Култаева текстти көрбөгөнүн, кол койбогонун айтып, текстти көрсөтпөй, окутпай жарыялаганы акмакчылык болгонун жазды.
Ал эми катты жазуунун идеясы меники деген Сонунбү Кадырова журналисттерге биринчи бети өзгөрүп кеткенин айтты. "Бул каттын идеясы меники. Деги эле 30 жылдын ичинде тынчыбай койдук го, ызы-чуу болуп эле. Анткени дайыма бийлик алмашкан сайын, ал бийлик отуруп алганга чейин митинг боло берет да. Анан алар митингди токтотом деп жүрүп, мамлекет бир топ артка кетет. Митингди токтотолу, тынч жашайлы деген демилгени көтөрүп чыктым. Менин катым 1,5 барак болду. Жарым барагына алтообуз кол койгонбуз. Кол койгонбуз дегенде мен баарын кыдырып жүргүм келбей, телефон аркылуу макулдугун алгам. Чындыгында алар катты көргөн эмес. Анан катты алып президенттин канцеляриясына алып бардым. Барсам салып коюңуз дешти. Мен ал эки барак катты бириктирбей эле конвертке салып, ящикке салып койгом. Ал кантип интернетке чыгып кетти билбейм. Биринчи бети өзгөргөн экен", - деди ал.
