Жогорку Сот мурдагы вице-премьер Равшан Сабировго карата чыгарылган өкүмдөрдү жокко чыгарды. Бул тууралуу бүгүн, 4-майда СЕРЕП МЕДИА маалымат агенттигине Жогорку Соттун басма сөз кызматынан билдиришти. Маалыматка караганда, жактоочунун 20-апрелде жазган арызы толук канаатандырылган.

"Жогорку Соттун 2013-жылдын 23-майындагы чечими жана Бишкек шаардык сотунун 2013-жылдын 7-мартындагы Сабировго чыгарган өкүмү жокко чыгарылды. Кылмыш иши жаңы апелляциялык соттук отурумга жөнөтүлдү", - деп айтылат маалыматта.

2011-жылдын декабрь айында Сабиров Социалдык өнүктүрүү министри кызматына дайындалган. 2012-жылдын июль айында ал пара талап кылган деген шек менен кармалган. 2013-жылдын 7-мартында Бишкек шаардык соту Сабировду Кылмыш-жаза кодексинин 310-беренеси менен күнөөлүү деп таап, анын мүлкүн конфискациялоо менен 5 жылга эркинен ажыраткан. 2014-жылдын март айында ал мунапыс менен бошотулган. 2020-жылдын октябрь айында экс-президент Сооронбай Жээнбековдун жарлыгы менен вице-премьер болуп дайындалган. 2021-жылдын 3-февралында бул кызматтан бошотулган. 2021-жылы 5-февралда ал президент Садыр Жапаровго кеңешчиси болуп дайындалган эле.