Жаза аткаруу кодексине өзгөртүүлөр киргизилди. Мыйзамда түзөтүү абактарында жаза өтөөнүн эксперименттик режимин колдонууга жол ачкан мыйзамга президент Садыр Жапаров кол койду. Мыйзамдын негизги ченемдери төмөнкүлөр: - жалпы режимдеги түзөтүү абактарында жаза өтөөнүн эксперименттик режими болот. Ага ылайык, обочолонгон участок түзүү мүмкүнчүлүгү каралган. Мунун баары ведомстволук актылар менен аныкталат; - соттолгон адам бойго жете элек баласынын жалгыз ата-энеси болуп эсептелсе, баласы менен жолугуу үчүн белгилүү мөөнөткө абактан тышка чыгууга укук берилет; - соттолгон адамдын жалпы билим алуу укугун ишке ашыруу максатында бир мекемеден экинчи мекемеге которуу мүмкүнчүлүгү каралат; - өзгөчө режимдеги мекемелерде жазасын өтөп жаткан соттолгондор үчүн акы төлөнүүчү жумушчу орун түзүү каралат; - соттун чечими менен түрмөгө которулганда жазанын мөөнөтүн жана шарттуу эрте бошотуу мөөнөттөрүн эсептөө үчүн эрежелер белгиленет.