Өткөн жылы ата-энелери миграцияда жүргөн 85 миң 459 бала аныкталган
2020-жылы ар бир үйдү кыдырып чыкканда, ата-энелери миграцияда жүргөн 85 миң 459 бала аныкталган. Бул тууралуу бүгүн, 20-январда эмгек жана социалдык өнүктүрүү министри Ализа Солтонбекова Жогорку Кеңештин жыйынында билдирди.
Анын айтымында, алардын ичинен 69 миң 530 баланын ата-энеси ички миграцияда болсо, 15 миң 929 баланын ата-энеси сырткы миграцияда.
“Биздин кызматкерлер ар бир үйдү кыдырып чыкканда 3 миң 816 баланы ата-энеси туугандык катышы болбогон жарандарга таштап кеткени аныкталды. Миграцияда жүргөн жарандардын балдары жакшы шарттарда жашаса да, алар камкордукка муктаж”, - деди министр.
Ализа Солтонбекованын айтымында, бул маселени чечүү үчүн мыйзам кабыл алуу пландалып жатат. Ага ылайык, мигранттар балдарын расмий түрдө камкорчуга таштап кетүүсү керек. Болбосо, аларга өлкөдөн чыгууга тыюу салынат.
